Ака уйӑхӗн 17-мӗшӗнче 2-мӗш номерлӗ Комсомольски вӑтам шкулӗнче «Туркай вулавӗсем» ятлӑ поэзи фестивалӗ иртрӗ. Хырай Ӗнел вӑтам шкулӗнче вӗренекен ачасем те ҫак конкурса хастар хутшӑнчӗҫ. 8-мӗш класра вӗренекен И. Зайцева В. Туркай ҫырнӑ «Тата тепӗр эксперимент» сӑввине вуласа призёр ятне илчӗ. 8-мӗш класра вӗренекен А.Мухина «Пучинке», 7-мӗш класра вӗренекен Е.Смирнов «Поэт чӗри» сӑвӑсене вуласа пурин кӑмӑлне те кайрӗҫ. В. Туркай конкурса хутшӑннисене тав сӑмахӗ каларӗ, малашне те хастар пулма сунчӗ, ҫӗнтерӳҫӗсене те, активлӑ хутшӑнакансене те дипломсем парса чысларӗ.