Хырай Ӗнел вӑтам шкулӗнче 2024-2025 вӗрену ҫулӗн пуҫламӑшӗ ытти ҫулхисенчен урӑхларах иртрӗ. Авӑн уйахӗн иккӗмӗшӗнче, вӗренӳ ҫулӗ пуҫланнине халалланӑ уяв кунӗ шкула ветеран педагогсем Нина Яковлевнӑпа Пётр Степанович Зайцевсем килсе ҫитрӗҫ. Вӗсем иккӗшӗ те нумай ҫул хушши ҫак шкулта вӗрентекен ӗҫӗнче вӑй хунӑ, иккӗшӗ те шкул директорӗ пулса ӗҫленӗ.

Ҫурла уйӑхӗн 29-мӗшӗнче Пётр Степанович 80 ҫул тултарчӗ. Ҫак паллӑ куна ялти культура керменӗнче анлӑ паллӑ туни те асрах-ха. Халӗ вара вӑл шкул хӑни.

Тӗл пулура ачасем тӗрлӗрен ыйтусем пачӗҫ. Хӑнасем шкул пурнӑҫӗнче, килте хӑйсемпе пулса иртнӗ интереслӗ историсем аса илсе каласа пачӗҫ. Нумай ҫул пӗрле, пӗр шкулта ӗҫленӗскерсен аса илсе каласа памалли нумай. Сӑмах май, Нина Яколевнӑпа Пётр Степанович 57 ҫул пӗр-пӗрне юратса, килӗштерсе пурӑнаҫҫӗ. Вӗсене итлесе ларма питӗ кӑмӑллӑ пулчӗ. Нина Яковлевна вырӑс чӗлхипе литератури предметне, Пётр Степанович музыка предметне вӗрентнӗ. Ачасен чунне музыкӑна юратма, илемлӗхе туйма хӑнӑхассине ӑша хывтарнӑ. Вӑл ертсе пынӑ хор конкурссенче яланах малти вырӑнсене йышӑннӑ. Музыка инструменчӗпе калама вӗрентекен кружок ертсе пынӑ. Районти культура керменӗнче ӗҫлекен талантлӑ Виктор Кокшин шӑп та лӑп унӑн вӗренекенӗ пулнӑ. Вӗрсе каламалли инструментсемпе калакансен ушкӑнне йӗркеленӗ. Ушкӑнпа ялти культура керменӗнче, кӳршӗ ялсенче час-часах концертсем йӗркеленӗ. Халӑх яланах йышлӑ пуҫтарӑннӑ.

Пирӗн ветерансем яланах хаҫат-журналпа интересленеҫҫӗ, шкулӑн ҫитӗнӗвӗсемшӗн савӑнаҫҫӗ. Паянхи кун та вӗсемшӗн шкул пурнӑҫӗ интереслӗ. Вӗсем тивӗҫлӗ канура пӗрре те ахаль лармаҫҫӗ. Хырай Ӗнел культура керменӗнче СВО валли сеткӑсем ҫыхаҫҫӗ, районти культура керменӗнче йӗркеленӗ «Кубняночка» анасмбле ҫӳреҫҫӗ.

Эпир Нина Яковлевнӑпа Пётр Степановича тарават пулса пирӗн пата тӗл пулӑва килсе уява илемлетнӗшӗн чӗререн тав тӑватпӑр. Юбилей ячӗпе саламлатпӑр. Канлӗ ватлӑх, ачасен, мӑнуксен ӑшшипе киленсе пурӑнма ҫирӗп сывлӑх сунатпӑр.

Л.Н. Владимирова вӗрентекен